إززيك.. فلان ولدي جاييكم هناك.

 

صديقي شغال مهندس في شركة كويسة برة السودان و وضعه ممتاز..

في مرة استقبل رسالة من قريبته كتبت فيها..

"إززيك.. فلان ولدي جاييكم هناك.. عليك الله شوف ليهو شغل معاكم"

صديقي بصدر رحب قرأ الرسالة.. و مرت الأيام و جاء "فلان"..

و صديقي استقبله بترحاب و وضّح ليهو كل مداخل و مخارج البلد.. و فرص التوظيف..

بس بعد انتهاء فترة الزيارة.. فلان ما اتوفق و رجع السودان..

صديقي بحكي قال لي: "قريبتي في أول مكالمة لامتني عدييل و قالت لي: كان تعتبره اخوك و تساعده"..

العبارة البسيطة دي كونها تطلع بالشكل ده.. معناها وراها ملامة و عتاب أكبر..

قدر شنو صاحبي ده بقى مُلام في نظر قريبته عشان ما شغّل ليها ولدها..

في بلد لا عنده فيها سلطة ولا منصب..

القصة دي و غيرها قد توضح إننا شعب نيته طيبة و بعشم في بعض خير..

لكن للأسف العشم ده لو ما اتقابل باستجابة ف بتظهر مشاعر سيئة..

لوم و عتاب يصل للمقاطعة في بعض العلاقات..

جارك المخاصم اخوهو عشان مرة طلب منه عربيته لي مشوار و اخوهو اعتذر..

قريبك الزعلان من جاره المسؤول الحكومي عشان ما شغل ليهو بته الاتخرجت من الجامعة بإمتياز..

و زميلك المتشاكل مع صاحبه السايق عربية عشان ما ديّنو قروش لما احتاج..

ح تلقى نماذج كتيرة..

ملخصها زول طلب.. و زول اعتذر..

الاعتذار ده عندنا مرفوض..

كيف يعني تعتذر؟.. كيف أطلب منك حاجة و ما تعمل لي الحاجة دي..

ما انا عشمت فيك! و انت مفروض تكسر رقبتك و تكون قدر عشمي..

ياخ ما مفروض.. و من غير تكسر رقبتك زاتو.. عادي نعتذر.. و عادي نتقبل أعذار الناس..

للأسف حجة "العشم".. خلتنا نوجد لنفسنا كامل الحق نعاتب و نلوم على قدر عشمنا..

و نوصمك بكل السوء الفي الدنيا لو أخفقت في مقياس عشمنا ليك..

نحن البنخت الامتحان و نصحح و تبقى غلطان لو ما جبت الدرجة الكاملة..

الحاجة دي بتخلي علاقتنا ببعض مرهقة.. و مبنية على أنك دايماً تجتهد و تعصر على نفسك عشان ما تطلع الزول الكعب و ما تشيل وش القباحة..

صحيح انه العتاب ده نابع من محبة و عشم بنية طيبة.. بس مؤذي يا اخوانا..

ما بأذي المتعشم.. بأذي المتعشمين فيهو ده زاتو..

في النهاية.. نحن عندنا قيّم عظيمة شديد..

فيها حب العطاء..

و نظرة الخير تجاه بعض..

خدومين.. و بنعصر على روحنا عشان الناس..

بس لازم ننتبه إنه المغالاة في الحاجة دي أثارها ممكن تنفر من الفعل الطيب ده زاتو..

ما ح أقول ما نعشم و نظن في الناس خير..

بس خلونا نتقبل انه طلبنا قد ما يستجاب..

و زي ما جينا بنية طيبة و مبتسمين.. نرجع بقلوب صافية..

نتقبل أعذار الناس.. و نتقبل إننا ما واحد..

و القدرة زاتها خشم بيوت.. و إذا قدرت الليلة عادي ما بتقدر بكرة..

و في لحظة الطلب دي ياريت نتذكر إنه مجرد "طلب".. ما "أمر"..

#علي_عباس